Voll ine - Der Sportpodcast

Die neu Ära isch da! Mir hend es neus Logo, en neui Website und en eigete Shop. Sprich, as isch di letscht Folg mit em alte Cover (RIP). Es riese Merci a d Babsi fürs ganze Rebranding und für d Geduld mit üs. Inhaltlich bliibt aber alles bim Alte: gföhrlichs Halbwüsse wie immer. Zum Start kläred mir, öb mer Zone 2 am Oktoberfest cha biohacke und wie de Andri sini Brülle uf de Achterbahn verlore het. Usserdem gits Tipps, was mer bim Taper und bim Carboloading lieber nöd sött mache. Dänn verzellt de Oscar vom Padelturnier bim Padelhub z Hochdorf. De Final isch verbotlet worde, aber bi de Tombola het er abgruumed. Im Fuessball gahts um d Nati. Sie holt trotz de Absänze vom Xhaka und vom Embolo vier Sieg us vier Spiel i de Nations League, und trotzdem nervt d Länderspielpause. Dänn chunnt s grosse Thema vo de Wuche: De Cristiano Ronaldo wird zum Ufwärme gschickt, chunnt nöd zum Iisatz und flügt drufabe mit em Privatjet uf Madrid. Mir diskutiered, wie mer als Legende sött ufhöre, und vergliched das mit em Messi. De Messi verabschiedet sich mit Standing Ovation und ere ziemlich durchkommerzialisierte Drohneshow vo de Albiceleste. Zum Schluss gönd mir no zum Velo. A de EM händ drü Millimeter zwüsched em Evenepoel und em Ciccone entschiede. Dänn no zur Formel 1: Z Malaysia het si endlich wieder mal Spass gmacht, au wenn d FIA vier Auto per Software abgschaltet het. Neue Shop und Website uf volline.ch, und folged üs uf Instagram! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

Voll Ine brucht wieder mal en Labertag. Egal ob Oktoberfest, Crew Girl oder Halbmarathonprep, d‘Jungs laufed heiss mit de Theme usem Alltag wo sie beschäftigt. Zuesätzlich muess natürli au no d‘Causa Xhaka/Embolo mit all sine Integre belüchtet werde bevor denn no d‘Velo WM mitem Überraschigssieger McNulty und de Dominatorin Demi Vollering de Abschluss macht. Du gsehsch, es lohnt sich. Darum wie immer, VOLL INE lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

Höche Bsuech im Studio z Steinhuse: Reto Schorno, Gschäftsfüehrer vom Swiss City Marathon, isch de Maa, wo de Oscar i letschter Ziit immer wieder i d Laufschueh zwingt. Und grad zum Afang es Gständnis: Er sälber isch kei Läufer, sondern ehemaligi Hammerwerfer. Sis Motto: En Psychiater muess au kei Psycho si. Mir redet über s Konstrukt hinter em Ahlas: Verein, Mandat a d Athletic Sport Consulting, wo im gliiche Büro au d Lucerne Regatta, d Ruder-WM 2027 und de Luzerner Stadtlauf organisiert. Über d Entstehig vor bald 20 Johr als Tourismusprojekt, wieso de Name «Swiss City» worde isch (Spoiler: «Switzerland Marathon» tönt im Usland nach Bärge) und wieso bewusst kei Start- und kei Priisgäld für Elite zahlt wird. Retos Credo: Es git kei schnälli und langsami Strecke, nur schnälli und langsami Läufer. Denn gohts um de Laufboom: 15'000 Aamäldige, 6'500 uf de Warteliste, Matcha Latte statt Vodka Energy und d Frog, wie gsund de Hype würkli isch, wenn für Strava und d Follower au mit Fieber gstartet wird. Dezue Rennbandite mit gfälschte Startnummere, Manne, wo i de Fraue-Kategorie ufs Podest laufed, Politiker vor de Wahle am Strosserand, Klimachläber und en gheime Plan B. Plus d Gschicht vo de Monika us Chur, wo am allererste Marathon aaglüütet hät, ob mer de Start nöd chli chönnt verschiebe. Zum Schluss d Brugg zum Rudere und wieso sich de Laufhype nöd eifach uf d Regatta überträge lot, en Usblick uf s 20-Johr-Jubiläum mit de European Masters Marathon Championships und en eigeti Podcast-Serie ab em 10. November. Und für alli, wo no en Startplatz für de 25. Oktober suechet: Tipps zur Startplatzbörse und zur Warteliste. ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

Nach langem sitzed mir wieder zäme vor Ort z Steinhuse – back in the hood, back to the roots. De Andri startet mit ere Promi-Rateruti us Crans-Montana: mit wem er i de Gondele ufe isch (Didier Défago, OK-Chef vo de Ski-WM) und wär ihm unde z Sierre über de Wäg gloffe isch. Dezue d Frag, wieso mer sich uf 3000 Meter halbtot strampled, nur will eim en Ski-Legende vo de Gondele us zueluegt. De Oscar hät derwiil e Erkenntnis gmacht: de Laufschueh macht öppis us. Bewusst ohni Carbon, dünni Sohle, fluoreszierend – und uf de Tartanbahn grad alli Rekord bis zäh Kilometer pulverisiert. Fazit: Placebo plus Freud am neue Material. Plus es Update zum «Claudio», sim sälber boute KI-Coach, wo s Training um s Oktoberfescht ume plant statt umgekehrt. Denn s grosse Thema: zum erste Mal e Live-Reaktion im Voll ine. Mir lueged beidi zum erste Mal die Sportwette-Werbig mit de Sydney Sweeney – 22,4 Millione Views uf X, 33 Millione uf Insta i füf Täg. Mir rede drüber, was das Bild mit junge Sportlerinne und Sportler macht, wieso im Sport grad kei «one size fits all» existiert, über 200 Millione Dollar Digitalwerbig vo de US-Wettaabieter i de erste siebe Mönet, über s Suchtpotenzial – und über d Erkenntnis, dass mir mit dere ganze Diskussion genau i de Streisand-Falle sitzed. De Name vo de Firma säged mir us Prinzip nöd. Tennis: de Zverev holt als erste Dütsche sit em Boris Becker 1989 d US Open – aber mit nur zwei Top-10-Sieg i allne vier Grand Slams die Saison und ere halbe Konkurrenz im Lazarett. Gratuliere trotzdem. Bi de Fraue stürzt d Rybakina d Sabalenka nach 99 Wuche vo de Nummere 1, und mir diskutiered Schlägerzertrümmerig als Ventil – inklusive Oscars Padel-Reu. Iishockey: de Patrick Fischer isch vier Jahr gsperrt, dörf aber theoretisch Klubcoach werde – und lanciert parallel «Team Patrick Fischer». Denn d Prognose zum Saisonstart: EVZ Platz 8 oder doch 4–6, Enttüschige bi Fribourg, Lugano und Bern, Hot Takes zum Ambri sine 30 Millione Schulde und zum Josh Holden. Meischtertipp: eimal Zürich, eimal Fribourg back-to-back. Alles usem Podcast vom gfährliche Halbwüsse. Velo: de Stefan Küng gwünnt zum zweite Mal s Vuelta-Zitfahre nach em Oberschänkelbruch, de Enric Mas als erste Spanier sit em Contador 2014 im Gsamtklassemänt, und d WM-Tipps stönd (van der Poel gäge Remco). Und d Voll-ine-Family liferet im Parasport wieder ab: Gold und Silber für d Flurina Rigling, Silber für de Fabian, nün Medaille für d Schwiiz total. D Lichtathletik chunnt z churz – s Ultimate Championship verdient e eigeni Folg. Chunnt nächst Wuche. ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

Internationali Schaltig: de Andri in Italie, de Osci ih de Schwiiz und eusi Gäschtin in Dänemark. Salome Ulrich isch nach Folg 70 zrugg bi üs. Dasmal als früsch bacheni WM-Bronzemedaillegwünnerin im Frauedoppelzweier. Und zum das Ganze no besser mache: Sie und d'Fabienne sind s erschti Schwiizer Frauemannschaftsboot mit ere WM-Medaille. S Highlight isch für sie aber nöd de Final, sondern de Halbfinal, wo si lang vierti gsi sind und denn a Kanada, Litaue und de amtierende Weltmeisterinne verbi zoge sind bevor de Coach sie grad wieder abeghole hät: guets Rennen, aber nöd meh als Standard. Dezue e Nacht, wo de Chopf alli Szenarie durespielt, Gwitterverschiebige, Sunneuntergang statt Mittagsrennen und e komplett neui Renntaktik im Final. Ussderdem: Wieso sie mitte in de Karriere entschide hät, Hebamme z werde, und nächscht Wuche s Vorpraktikum z Sarne startet. D Sporthilfe-Realität, wo bi de Medaillebilder niemert gseht (ohni Medaille wär d Bronzecharte wäg gsi). Es Schätzspiel, was World Rowing für d Shanghai Sprints zahlt. Und de Usblick uf d Heim-WM 2027 ufem Rotsee. Du gsehsch, es wird wieder mal brutal. Darum, wie immer, VOLL INE lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

De Andri macht de CH3000 i de Bärge, drum sitzt en würdige Ersatz im Studio: Fadri Barandun, Mountainbiker, letschtmal z Gast i Folge 66, und sit chuum ere Wuche Gwünner vom Swiss Epic. Er erklärt eus s Format, s Fünf-Tages-Etappe-Rennä im Zweierteam, und wie er mit em Andrin für s Team La Punt scho uf de erschte Etappe en Vorsprung vo 4:25 usegfahre hät. Local Knowledge uf de Abfahrte, vier Täg im gelbe Trikot, Zwüschezite vo de Familie am Streckerand statt Funk im Ohr, en verchüelte Teamkolleg am letschte Tag und am Schluss 1:33 Vorsprung. Dezue de Blick zrugg uf 2024, wo's ganz knapp danäbe gsi isch, und de Blick voruse uf d Marathon-WM am 12. September i Italie. Wiiteri Themen: Mountainbike-WM: Sina Frei mit Gold im Cross Country und Bronze im Short Track, Nicole Koller mit Bronze, obwohl ihres Team im Auguscht Insolvenz aagmeldet hät. Drus wird d Frag, öb de Mountainbike-Sport i de Krise staht. Fadris Iischätzig: Corona-Boom und Nachwehe, de Gravel-Boom, wo Marketinggäld abzieht, und immer höcheri Hürde für chlini Teams am Weltcup. Vuelta: De Pogačar stürzt uf de 8. Etappe use, Halswirbelfraktur und Hirnerschütterig, WM-Start offe. En Stei uf de Strass macht, was 200 Profis nöd hingchriegt hend. Derfür isch s Gsamtklassemänt wieder offe: Enric Mas füehrt vor Roglič und Felix Gall. Weltklasse Züri: Zwei Weltrekord a einem Abig, de erschti sit 17 Jahr im Letzigrund. Und d Audrey Werro gwünnt d 800 Meter i 1:53.70 und louft as erschti Frau überhaupt s dritte Mal under 1:54. Mit 22. Dezue Angelica Moser als Zweiti. De Weltrekord vo 1983 haltet nöd me lang. Ruder-WM Amsterdam: Salomé Ullrich und Fabienne Schweizer hollid Bronze im Doppelzweier, d erschti WM-Medaille überhaupt für es Schwiizer Fraue-Mannschaftsboot. Dezue Bronze für Claire Ghiringhelli im Para-Einer. Zwei Medaille us nün Boot, und es paar undankbari vierti Plätz. Voll ine hät ei Medaille prognostiziert, also gern falsch gläge. Zum Schluss no de Usblick uf d Ultimate Championships, s neu kondensierti Leichtathletik-Format us Amerika, und d Frag, öb de Fadri irgendwänn mal mit eus i es Ruderboot stiigt. Sofern er dinne bliibt. Darum, wie immer, VOLL INE lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

DISCLAIMER: Die aktuelli Folg hett bitzli Echo ufgrund vo de Ufnahme Situation. Sorry für das aber mier hoffed ier hend trotzdem Spass bim Lose! De Osci isch us Mallorca zuegschalte, de Andri sitzt ih de letzte Praktikumswuche z'Göschene. Zum Ihstig d'wichtigsti Frag vo de Wuche: Welle Velo-Spitzname würsch du dier geh? Juan Ayoli, Tadej Foccacia, Matthias Stillose, Marc Fürsi und Alberto Contadu sind scho vergäh, alles Wiitere gern i d'Kommentär. Dezue de Bericht vo de 50er-Rundi, wo de Oscar mit em Citybike im Windschatte vo zwei Rennvelo klebt hät. Und d Nachlese zum Strava-Take, wo eus so vill Rückmeldige brocht hät wie kein Take vorher: Mir sind chli einsiitig gsi, d Wahrheit liit irgendwo i de Mitti. Denn zum Sport: Ruder-WM Amsterdam, Tag 1 uf de Bosbaan mit Gegewind und sehr ungliche Bahne. Brunner/Plock über d Ziit wiiter, de Doppelzweier vo de Salomé und d'Fabienne ändli mit schnällem Start und über Rang 2 qualifiziert, d Olivia und d Sofia im C-Final. De Andri wagt e Prognos: ei Medaille, am ehschte de Fraue-Doppelvierer. Weltklasse Züri am Donnstig. 800 Meter Fraue mit Werro, Hodgkinson, Bol und Odira. Fallt de ältischti Weltrekord vo de Leichtathletik? Plus Warholm gege dos Santos, Moser gege Moon und Kennedy, Ehammer und Kambundji. Isch de Schwiizer Sport würkli so erfolgriich wie nie? Usghänkt am Tagesgspröch mit em Swiss-Olympic-Chef Roger Schnegg, inklusive de Frag, i welne Sportarte d Weltspitz überhaupt breit isch. Vuelta: Pogačar gwünnt s'Zitfahre z'Monaco, aber d'Gschicht ghört em Josh Tarling, wo 10 Täg nach em Tod vo sim 19-jährige Brüeder Finlay als Dritte a de Spitze mitfahrt. De Küng wird Zwölfte und schielt uf die 18. Etappe. Steve Guerdat isch mit Dynamix de Belheme Weltmeischter und de erschti Springriiter mit Olympiagold, EM- und WM-Titel. Historisch, und trotzdem hät's chuum en Sau intressiert. Drus wird e freii Diskussion über Riitsport, Millione-Rösser, klonti Polo-Pferd und d'Grenze bi Höchschtleischtig mit em Tier. #FreeDynamix. Usblick: Ruder-WM bis Sunntig, Vuelta lauft, Mountainbike-WM mit de Alessandra Keller, Fussball isch zrugg, Eishockey i de Vorbereitig. S Sommerloch isch verbii. Darum: Bliibed gsund, machid vill Sport, und ässed kei Pferd. ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

De Andri isch zrugg us de Ferie und startet grad mit ere Richtigstellig: Nei, er hät letzti Wuche nöd gseit, dass d Ruderer nöd me trainiere. Nur nöd me so hert. Damit isch das jetzt vom Tisch. Denn gaht's um s Wuchenend, wo de Oscar am liebschte usem Archiv lösche würd. Zäme mit de alte Schuelkolleg ufe Ortstock: 16 Kilometer, 1350 Höhemeter, und die chline Details, wo de Andri verschwiege hett, nämlich dass 900 vo dene Höhemeter uf de letzte zwei Kilometer chöme. De Oscar hät alli Five Stages of Grief durelebt, isch im rote Bereich gsi und erklärt üs, wieso das kein Type-1- und au kein Type-2-Fun gsi isch, sondern klar Type 3. Grettet hät ihn am Schluss nur eis: White Girl Music und Avicii am Gipfel. Vo dert wiiter zum grosse Thema: Runflation. Am Last Soul Ultra hät de Amerikaner Mark Dowdell 94 Rundene gmacht, also 630 Kilometer in 94 Stund. Mir diskutiere, wieso das Format so guet funktioniert, obwohl e Ultramarathon zum Zueluege eigentli langwilig isch. Es Fazit: d Lüt intressiert nöd, ob's 94 oder 76 Rundene sind, si wänd s Liide, d Battles und d Stories. Und mir chöme uf d Frag, wieso mir alli eusi Runs poste, statt eifach nur z laufe. Inklusive Oscars Abrächnig mit em VP-of-Irgendwas, wo sini 9 Mönet Ironman-Vorbereitig uf LinkedIn zelebriert. De zweiti Teil ghört de Leichtathletik-EM z Birmingham mit siebe Schwiizer Medaille: Angelica Moser verteidigt de Titel und isch wieder Europameisterin, was zweimal nachenand no einiges schwiiriger isch Jason Joseph liefert am Tag X nach schwiiriger Saison und hollt Gold über 110 Meter Hürde Audrey Werro gwünnt d 800 Meter nach em Drama im Halbfinal, wo si gstürzt isch und über en Juryentscheid wiiterchoo isch. Und ja, si louft z Züri am Weltklasse, wo de eltischti Weltrekord vo de Leichtathletik uf em Spiel stoht Simon Ehammer hollt Silber im Wiitsprung. S Angebot für de Voll-ine-Boost staht wiiterhin, Simi Dominic Lobalu wird Zweite über 10'000 Meter hinter em Amgren, wo s ganz Feld überrundet und 200 Kilometer pro Wuche trainiert Timothé Mumenthaler hollt Bronze über 200 Meter, plus d Kontroverse um Owen Ansah D 4x100-Meter-Staffle vo de Fraue hollt Silber, und die Story vo dere Medaille isch für üs nöd de Schlusssprint, sondern de Verzicht vo Ajla Del Ponte. Selbstlos, und für üs s Bispiel für richtig starkes Leadership Denn no s Übligi vo eusem Stammgast Nick Kyrgios, wo mit Kokain im Bluet uffgfloge isch. Provisorisch gsperrt, im Rehab, und mir gsind wahrschinlich s Ändi vo sinere Karriere. Uf ere Skala vo 1 bis 10: Wie überrascht bisch? Us de Voll-ine-Family hämmer üs gfreut über Nina Brunner, wo mit de Tanja Hüberli s Elite-16-Turnier z Hamburg gwünnt und nach de Mutterschaft in Rekordziit wieder oben aa isch. Und über Stefan Küng, wo nach em Oberschenkelbruch s Zitfahre an de Tour de Pologne gwünnt. Sin erschte World-Tour-Sieg sit de Vuelta 2024. Zum Schluss d Vuelta-Preview: Start am Samstig z Monaco, Ziel am 13. September z Granada. 21 Etappe, 3275 Kilometer, über 58'000 Höhemeter. De Maa zum Schlage isch klar de Tadej Pogačar, de Jonas isch nöd debii, und mir hend Schwiizer Beteiligung mit Küng, Hirschi, Thalmann und Fabian Weiss. Und nächsti Wuche gaht d Ruder-WM z Amsterdam los, drum lohnt sich au s Nachehöre vo Folge 221 mit em Padi. Bliibed gsund, machid vill Sport, mir gsehnd üs nächsti Wuche. ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

De Andri isch die Wuche nöd debii, drum macht de Osci die Folge solo. Dafür mit em Gast, wo mir scho lang aakündigt hend: Patrick «de Ballon» Brunner, 25i, sit 2018 im Schwiizer Nationalteam und mit em Jonah Plock im Zweier-ohni erfolgrich underwegs (znd ja, si fahred würkli s glich Boot, wo de Andrin Gulich und de Roman Röösli z Paris drin gsässe sind. Grössi Fuessstapfe gits chuum). De Pädi isch in Redeluune und darum redemer unter anderem über: Woher de Spitzname «Ballon» chunnt (Spoiler: es hät nix mit Droge z'tue) De Saisonrückblick: agschlage z Sevilla, Plovdiv usglah, Bronze am Weltcup a de Heimstrecki uf em Rotsee und en fünfte Platz a de EM z Varese, wo definitiv en Enttüüschig gsii isch Warum es ke schlächts Zeiche isch, wenn en A-Final für d Nati scho fast e Enttüüschig isch D WM-Vorbereitig z Amsterdam: Trainingslager, Tapering, Pilatus ufe und ganz wichtig, Zone 2 statt Strava-PB Wie es isch, als Profisportler amene Ruhetag a de Tour de France am Stroossenrand z stah Klartext zum Zuestand vom Weltcup: Nationen, wo nöd ihri beschte Boot schicked, d Franzose wo im Trainingslager am glichen See sind aber d EM nöd fahred, und warum de Sport so i d Bedütigslosigkeit rutschet. Chuegloggä, Trommlä und d Frag, öb d Ruderszene e Velo-Crowd bruucht D Konkurrenz z Amsterdam: d Neuseeländer sind die Saison ungschlage, und dezue Australie, Rumänie, Litaue, Griechelad und Spanie Wie viel Medaille für d Schwiiz drin ligged (mir zelled dure) und warum de Padi nöd z fest a Medaille dänke wott Trainingsmethodä hüt vs. under em Ian Wright: weniger Ruder-Kilometer, meh Periodisierig, meh Velo und Joggä, aber sicher nöd weich Feschte im Rudersport: Balti-Bar z Varese, de legendäri Abig z Prag 2023 und s Chat Noir z Paris De Fuessball-WM-Effekt: 300 Brasilianer und viier Norweger am Public Viewing z Luzärn, und warum d norwegische Fans meh fürs Rudere gmacht hend als World Rowing Usblick uf LA 2028 mit möglichä Doppelstarts und uf d Heim-WM 2027 uf em Rotsee, s erschte Mal sit 26 Jahr. Inklusiv Ziitplan, Olympia-Quali und de Frag, öb Fackle im Naturschutzgebiet legal sind Und zum Schluss gits für de Oscar no de Rittersclag vom Ballon persönlich als Ruederexperte. Du gsehsch also es lohnt sich! Darum, wie immer, VOLL INE lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

Bi de dritte Hitzewälle hend de Osci und de Andri chuum no chüeli Chöpf, aber de Sport lauft trotzdem heiss. Zerscht gaht's a d'Ruder-EM z'Varese. Zum erschte Mal überhaupt hät es Schwiizer Frauegrossboot Gold gholt, de Vierer mit Nina, Lisa, Flavia und Celia, und das no am 1. Auguscht. Mir redet über de Rennverlauf, worum das Projekt vom Frauedoppelvierer endlich richtig abgaht, und werfet en Blick uf d'WM z'Amsterdam. Zuesätzlich: werum di starke Natione wie Holland und GB d'EM so gern schwänzet, e Diskussion, wo de Osci so richtig ufregt. Denn wird's politisch. De Infantino hät sini Idee, d'Kommerzialisierigsrächt vo FIFA-Wettbewerb als Aateilschii z'verchaufe (Stichwort Kushner, 20 Milliarde), wieder zrugg zoge. Mir redet drüber, worum d'UEFA und anderi Verbänd Nei gseit hend, und ob de Gianni sini nächscht Wahl überläbt. Wiiter mit de Frauedominanz. D'Alessandra Keller (Voll Ine Family!) hät a de Mountainbike-EM z'Monte Tamaro zweimal Silber hinter de Sina Frei gholt. D'Marlene Reusser fahrt a de Tour de France Femmes is Gäl, inklusiv ihrer «Mission Dijon», und de Osci verzellt, wie ihn d'Demi Vollering emal am Zugersee im Töff-Windschatte pflotzt hät. Und a de Leichtathletik-EM z'Birmingham (10. bis 16. Auguscht) gaht d'Schwiiz mit de grösschte Delegation ever an Start. Mir buechet scho mal fliissig Goldmedaille ii für Frey, Moser, Kaelin, Kambundji und Lobalu. Zum Schluss die grossi Frag: Wer isch de krassischt 19-Jährig uf de Wält? De Luke Littler hät gmeint, nöd de Lamine Yamal, und damit e Debatte losglöst zwüsche Yamal, Littler, Kimi Antonelli und Paul Seixas. Stimmet ab! Nächsti Wuche: De Patrick Brunner aka Ballon z'Gascht! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

In dä 219. Folge tauched de Oscar und de Andri zerscht i d Chindheit ab: Weli Turnspiel us dä Schuelziit müesst mer als Erwachsene dringend wieder mal uspacke? Vo Burgävolk übers Brennball bis zum ewige Striit, öbs jetzt «Völkerball» heisst oder nöd. De Andri verzellt vo sim Traum, als schnellschte Mensch überhaupt dur de Gotthard-Sicherheitsstollä vo Göschenä uf Airolo z «säcklä» – 17 Kilometer schnuergrad. Und de Oscar het en strengä Sporttag hinder sich: mitem Velo vo Zug uf Züri (mit es paar Strava-PRs), denn bi 36 Grad Tennis mit em Chef. Passend dezue rekapituliäred si de Bsuäch am Zug Open, stuned über s Tempo vom Häusler live – und rechned vor, wie wenig e Tennisprofi uf de füfte Turnier-Stufe eigentlich verdient. Denn wirds spannend: De Oscar stellt sin KI-Personal-Coach «Claudio» vor, wo sini Whoop- und Strava-Datä uslisst, ihm s-Training zämestellt, jede Tag es Check-in macht und de Trainingsplan dynamisch aapasst. Sportlich gseh dreiht sich denn alles um d Tour de France 2026: Pogačar holt sin fünfte Gesamtsieg und zieht mit de Legende gliich, verschenkt derbii sogar Etappe a de Del Toro. Gross3 Jubel gits bi de VOLL INE FAMILY: Geraldine di Tizio-Frey rennt über d 100 m mit 10.96 persönlichi Bestziit (windlegal) und isch damit schnellschti Europäerin vom Jahr und drittschnellschti Schwiizerin überhaupt. Und Angelica Moser holt de Schwiizermeischtertitel im Hochsprung mit 4,70 m – trotz Fuessverletzig im Vorfäld. Beidi mit Blick uf d'EM Mitti Auguscht z^Birmingham, wo d Jungs uf Medaillä hoffäd. Zum Schluss no de grossi Ärger – Infantinos Plan, d Fussball-WM z privatisierä – plus en Uusblick uf d Ruder-WM mitem Paddy «Ballon» Brunner. Abonniert de Podcast uf Apple Podcasts und Spotify, lönd 5 Sternä da und folgäd üs uf Instagram. Bliibäd gsund, machäd viel Sport und trinkäd gnueg Wasser bi dänä Temperaturä! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

De WM-Final isch gschpillt, de Titel isch verteilt. Mir mached, was mir am beschte chönd: gföhrlichs Halbwüsse zum ganze Spektakel. De Osci fiiret sini Spanier bis am halbi drü z'Nacht mit dä Familie, ganz kitschig. Er verzellt euch, werum d'Gerächtigkeit im Fuessball gwunne het und werum es fascht no schöner isch, dass Argentinie nöd gwunne het. Mir näme d'Mauer-Taktik vo dä Argentinier usenand, rede über Enzo Fernández sini rot Charte wo längscht überfällig gsi wär, und werum de Messi immer no de Bescht isch, aber sini Truppe... na ja. Denn: s'Ganze Glanz&Gloria als absoluti Reizüberfluetig. Speed, Tom Cruise, Post Malone, BTS, Justin Bieber, d'Muppets und natürlich de Shakira-Ohrwurm wo mir zerscht ghasst und denn gliebt händ. Dezue: de Trump, d'USA als Gaschtgäber und öb 48 Team eigentli e gueti Idee gsi sind. Spoiler: jaa. Ändli chürämer de Wältmeister vom Tippspiel. Gratulation, Philippe Ständeros! Und zum Abschluss no e Portion Tour de France: de Mauro Schmid holt als Schwiizer en Etappesieg, erscht dä zweit sit 6 Jahr, de Vingegaard lit am Bode und de Kampf um Platz zwei wird richtig spannend. E chaotischi Folge, danke Internet 🙃, aber voll ine wie immer. ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

D'Nati isch dusse, aber wie! 120 Minute gäge de Weltmeischter, s'Ndoye Goal, und denn de Moment, wo alles kippt: Gelb-Rot für Embolo. Mir diskutiered, öb das es ehrevolles Usscheide gsi isch oder die verpasst Jahrhundert-Chance. Wiiter gahts mit em Halbfinal Spanie–Frankriich: D'Spanier lönd em Mbappé kei einzige Schuss ufs Tor zue. Und denn no de Kracher England–Argentinie: Kane und Bellingham gäge de 39-jährig Messi bi sim letschte grosse Tanz. Mir leged üs fescht, wer in Final chunnt. Bi de Tour de France fahrt de Pogačar allne devo (scho wieder), de Merlier sprintet doppelt, und z'Nevers passiert s'Unglaublichste vo de Wuche: De Wærenskjold gwünnt d'schnellst Tour-Etappe aller Ziite, ei Tag nachdem er als Letschte is Ziel cho isch. Und zum Abschluss Wimbledon: De Sinner lat em Zverev zum zähte Mal in Serie kei Chance, und im Damen-Final vergiit d'Nosková sächs (!) Matchbäll, bevor si sich als jüngsti Siegerin sit 2011 doch no krönt. Darum, wie immer, VOLL INE lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

D'Schwiz spielt ihri besti WM allerziite und Voll Ine isch wieder mal z'vorderst ufem Bandwagon und dass, obwohl beidi nedemal s'ganze Spiel gege Kolumbie gseh hend... Trotzdem simmer heiss wiene Moooooore uf das Spiel gege de argentinisch Zauberzwerg und us irgendeme Grund träumemer scho vo dem WM-Final. Vor dem gihts aber no Bretter wie Frankrich-Marrokko, Spanie-Belgie und Norwege-England wommer natürli au no analysieret! Dezwüsche gihts wie immer wieder mal chli Abschweifer und Gossip rund ums Glanz & Gloria bi de Spielerfraue, Trump sini Ihflussnahm und Infantino sini Skandäl. Darum, wie immer, VOLL INE lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

"HALLO MAJOR TOM, KÖNNEN SIE MICH HÖREN?" Das Brett wirds ah dere WM definitiv nümme z'höre geh! Dütschland verabschieded sich sang- und klanglos us de WM und zumindist ein Teil vo Voll Ine gnüsst die Hatewatch richtig. Nebst de Dütsche verwütschts under Anderem au no d'Holländer, am Osci sini Japaner und am Andri sini Ecuatorianer. Generell chammer sege: d'WM lauft langsam heiss! Guets Stichwort! D'Liechtathletik-Damene laufed au zu Höchstform uf und bewised, dass mit ihne bi de EM z'rechne isch und es bitz Ruedere ufem Rotsee wird die Folg au no besproche! Darum, wie immer, VOLL INE lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

Wuche 2 vo de WM und Voll Ine isch voll im Manzambi Fieber! Usserdem analysieremer no de Rest vo de Spiel. Egal ob Dark Ponies Belgie oder Pferd Holland. Jedes Land bechummt sin Spotlight. Nebst Fuessball gihts aber au no Ruedere und Drama bim EVZ. Darum, wie immer, VOLL INE lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

Die 213ti Folg vu VOLL INE isch eigentlich en Recap vude erste WM Wuche. Perfekt für so lüüt wie de Andri wo ned am morge am 6ii ufstönd zums WM Bedürfnis befriedige. Zum Glück hemmer üse Experte Onkel Osci wo alli Infos, Zämefassige und fun facts no im chopf hed! Nebst de einzelne Matches wo ufgarbeitet werdet gits auno en Iblick die persönliche Sphärene vude beide Hosts, zum Bispiel wieso de Andri mitm Voll Ine Number One Nici Huber unterwegs gsi isch und de Osci weiss, das de Patrick Fischer noni ganz mitm Verband abschlosse hed…zum Schluss wird auno Velofahre, Formel 1, Liechtathletik und Hockey zumne guete Abschluss agschnitte. Blibed dra und gönd VOLL INE! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

Mitem hüttige Gast wird Voll Ine scho fascht zum offizielle Podcast vu Swiss Ski. Wemmer d Lea Meier kennelernt merkt mer schnell, sie ghört eigentlich scho lang zude Voll Ine Family. Sympathisch, Sportlich und ufgstellt sind numme es paar Charaktereigeschaft wo sich i dere Folg ganz klar zeiged. D Lea isch Biathletin und hed im letzte Winter ihri Position ide Weltspitze und ade OLYMPISCHE Spiel chönne etabliere. Nebst ihrne Leistige ufem Schnee verzellt üs d Lea aber no viel meh...wieso Atmig generell unterschätzt wird und woher dasses chunt, dass Biathlon eini vude meistverfolgte Wintersportarte isch aber ide Schwiiz no chli Startschwierigkeite hed. Das alles und no viel meh bi VOOOOOLL INE! _______ De Voll Ine WM Tippgruppe bihtrete und geili Prise gwünne! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

De Schmerz leid sich numme langsam nach de verlorene Niederlag vude Schwiizer Ishockeynati. Au bim Osci und Andri sitzt de Schock no tüüf. Was hilft da besser als mit guete Kollege rede und das ganze z analysiere und verdaue? Doch de nächst Hype-Train staht scho ufem Fahrplan: D Fuessball WM i einere Wuche! Wenner wend Tipps fürd d Tippgruppe ha denn müender unbedingt lose, wer das Jahr Weltmeister wird. Zuedem verzellt de Andri vude Krawall in Paris, wo er live debii gsi isch…(ohni illegali Aktione verstaht sich). Zum Schluss gits no chli Giro und Tennis zum Dessert. Was füren grandiose Sportfrüehlig bis jetzt und de Summer wird ned schlechter!! Drum Voll Ine lose und uf de Reis debii sii! _______ De Voll Ine WM Tippgruppe bihtrete und geili Prise gwünne! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.

De Lenz Hächler gilt als eini vo de spannendste Schwizer Ski-Hoffnige für die nächste Jahr. Junioreweltmeister im Slalom, Europacup-Gesamtsieger, Weltcup-Fahrer und jetzt mit fixe Startplätz in allne Diszipline: De Zuger bringt alles mit, was es für e grosse Karriere respektive de Gsamtweltcupsieg brucht. Ih dere Folge reded mir mit Lenz über sin Weg vom Nachwuchstalent bis is Swiss-Ski-Team, über sini stark Europacup-Saison, de Sprung in Weltcup und was sich ändert, wenn plötzlich alles schneller, grösser und lüter wird. Natürlich gahts au um de Vergleich mit Marco Odermatt, Erwartigsdruck vo usse und d’Frag, wie mer als junge Fahrer sin eigen Weg findet. Mir redet aber nöd nur über Resultat und Rangliste. De Lenz verzellt, wie viel Skatepark und Freestyle i sim Skifahre steckt, warum Style und wildi Frisure irgendwie zu ihm ghöred und wie er mit Verletzige, Risiko und Rückschläg umgaht. Dazu gahts um sini Disziplinewahl, sini Rolle im Swiss-Ski-Team und de Blick uf die nächst Saison mit em Highlight Adelbode. E Folge über Talent, Tempo, Druck, Lockerheit und e Skifahrer, bi dem mer s’Gfühl het: Da chunnt no einiges. Darum, wie immer, VOLL INE lose! ________ Webseite/Shop: www.volline.ch Instagram: @volline_podcast Hosted on Acast. See acast.com/privacy for more information.